AMEA Milli Azərbaycan Tarixi Muzeyində AXC-nin və Parlamentinin 100 illiyinə həsr olunmuş bədii-tarixi tərtibatlı tədbir - tamaşa keçirilib. Muzeyin elmi işçisi Ləman Musayeva tərəfindən Bakı Atatürk liseyinin şagirdlərinin iştirakı ilə səhnələşdirilmiş bu tədbirdə AXC dövrü 3 hissədə canlandırılmışdır. 1. Müstəqil Bakı şəhəri və əhalisi; 2. Parlamentin açılış iclası (stenoqramlar əsasında); 3. H.Z. Tağıyevin xeyriyyə məclisi. Tamaşada Cümhuriyyət qurucularının keçdiyi ağır və şərəfli yol, dövlətin ilk addımlarının fədakar, maarifçi və vətənpərvər ziyalılar, məmurlar və xeyriyyəçilərimiz tərəfindən dəstəklənməsi, sadə əhalinin Parlamentin açılışına bayram tədbiri kimi hazırlığı və maarifpərvər xanımlarımızın arxa plandakı fəaliyyətləri üzə çıxarılıb. Tədbir muzey-məktəb əlaqələrini möhkəmləndirməklə yanaşı, böyüyən gənc nəslin vətənpərvərlik hislərinin möhkəmləndirilməsinə xidmət edir. Bədii-tarixi tərtibatda hazırlanmış tamaşa muzey rəhbərliyi və lisey müəllimləri, şagird-valideyn kollektivi və Səbayıl rayonunun orta məktəblərinin direktorları tərəfindən izlənərək, məmnunluqla qarşılanmışdır. Tədbirdə çıxış edən Muzeyin direktoru, akademik Nailə Vəlixanlı Cümhuriyyət dövrünün, o cümlədən, kişilərlə çiyin-çiyinə mübarizə aparan xanımların şərəfli həyatının şagirdlər tərəfindən səhnələşdirilməsini təqdir edib. Həmçinin, o istiqlal fədailərinin yolunu davam etdirməyi, onların fədakarlıqla dolu həyatlarından nümunə götürməyi, heç bir zaman unutmamağı şagirdlərə tövsiyə edib.