Bu günlərdə AMEA Milli Azərbaycan Tarixi Muzeyinin kitabxanasına yeni nadir kitablar təqdim edilmişdir. Bu kitablar görkəmli Azərbaycan şərqşünası, tarixçi, arxeoloq, t.e.n. Əjdər Ələsgərzadənin (1895-1964) şəxsi arxivindən olub, onun qızı, Muzeyin Numizmatika fondunun müdiri Zümrüd Ələsgərova tərəfindən hədiyyə edilmişdir. Kitabların içində məşhur Azərbaycan şairi, hürufi mütəfəkkiri İ.Nəsiminin XVI əsrə aid olduğu ehtimal edilən Divanının əlyazma bir nüsxəsi də var. Qeyd edilən əsər əski əlifba ilə, Azərbaycan türkcəsindədir və orta əsrlər Azərbaycan sufi-hürufi fəlsəfəsinin tədqiqi baxımından önəmlidir.