Bu günlərdə AMEA Milli Azərbaycan Tarixi Muzeyinin kitabxanasına yeni nadir kitablar təqdim edilmişdir. Bu kitablar görkəmli Azərbaycan şərqşünası, tarixçi, arxeoloq, t.e.n. Əjdər Ələsgərzadənin (1895-1964) şəxsi arxivindən olub, onun qızı, Muzeyin Numizmatika fondunun müdiri Zümrüd Ələsgərova tərəfindən hədiyyə edilmişdir. Kitabların içində XIX əsr alman müəllifi Adolf Berjenin 1867-ci ildə Almaniyanın Leypsiq şəhərində nəşr etdirdiyi “Qafqaz və Azərbaycanda məşhur olan şüəranın əşarına məcmuədir ki, Adolf Berje sahib cənabının ihtimamı ilə mətbu olunubdur” kitabı da var. Adı çəkilən məcmuə M.P.Vaqifin, Q.Zakirin və başqa Azərbaycan şairlərinin şeirlərindən ibarət topludur. Əsər klassik Azərbaycan ədəbiyyatının tədqiq və təbliği baxımından əhəmiyyətlidir.