27 fevral 2019-cu il tarixində saat 15:00-da AMEA Milli Azərbaycan Tarixi Muzeyinin Xarici əlaqələr və elmi-kütləvi iş şöbəsi və Bakı şəhərindəki Rusiya İnformasiya və Mədəniyyət Mərkəzinin birgə təşkilatçılığı ilə Muzeyin “H.Z.Tağıyev” klubunda görkəmli rəssam İsaak Brodskinin (1884-1939) anadan olmasının 135-ci ildönümünə həsr olunmuş “Bir portretin tarixçəsindən” adlı elmi-seminar (rus dilində) keçiriləcək. Tədbirdə Muzeyin elmi katibi, tarix üzrə fəlsəfə doktoru, dosent Fərhad Cabbarov H.Z.Tağıyevlə İ.Brodskinin görüşü, portretin yaranma tarixçəsi haqqında çıxış edəcək. Muzeyin bərpaçı-rəssamı Gülşən Hacıyeva isə portretin bərpası mövzusunda dinləyiciləri məlumatlandıracaq. Qeyd edək ki, XX əsrin əvvəllərində gənc rəssam İ.Brodskinin yaradıcılığı Azərbaycanla bağlı olmuşdur. Məşhur xeyriyyəçi, mesenat, sahibkar H.Z. Tağıyevin portretini çəkmək kimi məsuliyyətli işin öhdəsindən gələn İ.Brodski, əsəri 1912-ci ildə təhvil vermişdir. Hazırda həmin portret Milli Azərbaycan Tarixi Muzeyində yerləşən H.Z.Tağıyevin xatirə muzeyində nümayış olunur.