Sizi Novruz bayramı münasibətilə ürəkdən təbrik edir, hər birinizə cansağlığı, səadət və gələcək işlərinizdə yeni-yeni uğurlar arzulayırıq. Novruz bayramı tarix boyu xalqımızın mənəviyyat dünyasının ayrılmaz hissəsi olmuş, bütün keşməkeşlərə baxmayaraq azərbaycanlılar tərəfindən qorunub- saxlanmış, həmişə uca tutulmuşdur. Novruz bayramı demək olar ki, Azərbaycanla yanaşı Şərqdə də xüsusi təntənə ilə qeyd olunur. Heydər Əliyev Fondunun prezidenti, UNESCO və ISESCO-nun Xoşməramlı səfiri, millət vəkili Mehriban xanım Əliyevanın böyük səyi nəticəsində Novruz bayramı UNESCO tərəfindən Qeyri-Maddi Mədəni İrs üzrə Reprezentativ siyahısına daxil edilmişdir. 28 Sentyabr - 2 oktyabr 2009-cu il tarixində Birləşmiş Ərəb Əmirliklərinin Abu-Dabi şəhərində keçirilmiş UNESCO-nun Qeyri-Maddi Mədəni İrs üzrə Hökümətlərarası Komitəsinin 4-cü Sessiyası çərçivəsində qəbul edilmiş qərara əsasən, Novruz çoxmillətli nominasiya (Azərbaycan, Hindistan, İran, Qırğızıstan, Pakistan, Türkiyə, Özbəkistan) kimi UNESCO-nun Qeyri-Maddi Mədəni İrsin Reprezentativ Siyahısına daxil edilmişdir. 23 fevral 2010-cu ildə isə BMT Baş Assambleyasının 64-cü sessiyasının iclasında mart ayının 21-i "Beynəlxalq Novruz Günü" elan edilmişdir. Bu uca və müqəddəs bayram münasibətilə təbrik edir, “Novruz bayramınız mübarək olsun!” deyirik! Qeyd edək ki, Novruz bayramı ilə əlaqədar Milli Azərbaycan Tarixi Muzeyi martın 20-22-də işləməyəcək. Martın 23-dən etibarən Muzeyin elmi ekspozisiyası adi iş qrafiki ilə fəaliyyət göstərəcək. Novruz bayramınız mübarək olsun!