Sumqayıt şəhərində fəaliyyət göstərən “Əlilliyi Olan Şəxslərin Sosial Müdafiəsinə və İnteqrasiyasına Dəstək” İctimai Birliyi tərəfindən “Yaz Düşüncələri” adlı tədbir təşkil edilib. Novruz bayramı ilə əlaqədar keçirilən tədbirdə AMEA Milli Azərbaycan Tarixi Muzeyinin elmi işçisi Sahibə Ələkbərova da iştirak edib. O, Muzeyin rəhbərliyi və kollektivi adından tədbir iştirakçılarını bayram münasibəti ilə təbrik edib. Həmçinin Muzeydə həyata keçrilən “Muzeylərimizi tanıyaq və tanıtdıraq” layihəsi haqqında məlumat verib. O, bu layihənin fiziki məhdudiyyətli şəxslərin muzeyə cəlb edilməsi və onların Azərbaycan tarixi ilə yaxından tanış olmaqla yanaşı cəmiyyətə inteqrasiyasına da dəstək məqsədilə həyata keçirildiyini qeyd edib. Bu istiqamətdə artıq əməkdaşlığa başladıqlarını bildirərək, tədbirdə iştirak edən fiziki məhdudiyyətli şəxsləri Muzeyə dəvət edib. Qeyd edək ki, 01.03.2019-cu il tarixində Sumqayıt şəhərində yerləşən “Əlilliyi Olan Şəxslərin Sosial Müdafiəsinə və İnteqrasiyasına Dəstək” İctimai Birliyinin bir qrup üzvü Milli Azərbaycan Tarixi Muzeyini ziyarət etmişdir.