Monteneqro Elmlər və İncəsənət Akademiyasının prezidenti, professor Dragan Vukcevic və onun xanımı AMEA Milli Azərbaycan Tarixi Muzeyində olublar. Qonaqlar Muzeyin ekspozisiya zallarını, H.Z.Tağıyevin xatirə muzeyini ziyarət ediblər. Onlara Muzeyin tarixi və Azərbaycan tarixini əks etdirən eksponatlar barədə, həmçinin görkəmli xeyriyyəçi, sahibkar H.Z.Tağıyev haqqında məlumat verilib. Onun müsəlman Şərqində ilk müsəlman qızlar məktəbinin yaradıcısı olması qeyd edilib. Xalqımızın bir çox görkəmli şəxsiyyətinin təhsil almasına yardımçı olmuş H.Z.Tağıyevin həyat və fəaliyyətinə dair fotoşəkillər, tarixi sənədlər, ona məxsus qiymətli əşyalar qonaqlar tərəfindən maraqla qarşılanıb. Sonda qonaqlara Muzeyin nəfis tərtibatlı nəşrləri təqdim edilib və D.Vukcevic Muzeyin xatirə dəftərinə öz xoş təəssüratlarını yazıb.