Aprelin 18-də “Beynəlxalq abidələr və tarixi yerlər günü” münasibətilə Azərbaycanın müdafiə istehkamlarına həsr olunmuş “Daş keşikçilər” kitabının təqdimatı keçiriləcək. “İRS Publishing House” nəşr evi tərəfindən çap edilmiş kitabın müəllifləri Milli Azərbaycan Tarixi Muzeyinin şöbə müdiri, t.ü.f.d. Səbuhi Əhmədov və tanınmış Rusiya jurnalist və publisisti Andrey Vasilyedir. Azərbaycan, rus və ingilis dillərində hazırlanmış kitabın əsas ideyası Azərbaycan tarixini Azərbaycan istehkamları tarixi prizmasından verməkdir. 206 səhifə həcmi olan nəfis tərtibatlı kitabda çoxlu sayda fotoşəkillər, qala və qəsrlərin 3d qrafikalı şəkilləri, indiyədək nümayiş olunmamış Cənubi Azərbaycanın bir sıra qalaların fotoları əks olunmuşdur. Kitabın məsləhətçisi Azərbaycan Respublikası Mədəniyyət Naziri Əbülfəs Qarayev, layihənin rəhbəri və baş redaktoru Musa Mərcanlı, elmi məsləhətçilər memarlıq üzrə elmlər doktoru, AMEA müxbir üzvü Cəfər Qiyasi, tarix elmləri doktoru Tarix Dostiyevdir. Təqdimat mərasimi “Boulvard Hotel Baku” mehmanxanasının Tağıyev zalında keçiriləcək.