AMEA Milli Azərbaycan Tarixi Muzeyində Xarici əlaqələr və elmi-kütləvi iş şöbəsinin təşkilatçılığı ilə “Kreativ mühafizəkarlar” adlı məktəblərarası viktorina keçirilib. Viktorina 18 aprel – Beynəlxalq Abidələr və Tarixi Yerlər Gününə həsr olunub. Viktorinanın aparıcısı Ləman Musayeva viktorinanın mahiyyəti və qaydaları haqqında iştirakçılara məlumat verdi. Qeyd etdi ki, viktorinada Bakı şəhəri Kərim Kərimov adına 8 nömrəli tam orta məktəbin “Turan” klubu, Xətai rayonu 17 nömrəli tam orta məktəbin “Mübariz” klubu və Akademik Zərifə Əliyeva adına liseyin “Tarixi aləmarayi” klubunun üzvləri iştirakı edib. Viktorinanın münsiflər heyəti Muzeyin elmi əməkdaşlarından ibarət idi: 1. Vahabova Sevinc (t.ü.f.d, dosent); 2. Abdulova Gülzadə (t.ü.f.d., dosent); 3. Məmmədova Aygün (t.ü.f.d.); 4. Mustafayev Laçın (elmi işçi). L.Musayeva bildirdi ki, viktorinanın məqsədi məktəb-muzey inteqrasiyasını genişləndirmək, şagirdlərin tariximizə, irsimizə, maddi-mədəniyyət abidələrimizə olan diqqət və qayğısını artırmaqdır. O cümlədən, Vətənimizin tarixi incilərini məktəblilərə əyani şəkildə nümayiş etdirməklə, ona olan heyranlıq və sevgini təmin etməkdir. Viktorina dövlət təhsil proqramına və muzey nəşrləri ilə muzey ekspozisiyasına əsaslanır. Həm də elmin populyarlığına xidmət edən bu tədbir maarifləndirici, əyləndirici, şövqləndirici və milli irsimizin təbliğatı xarakterini daşıyır. Sonra 6 bölmədən (tarixi memarlıq abidələri və şəhərlər, tarixi hadisələr, silah və əsləhələr, etnoqrafiya, arxeologiya və numizmatika) və 2 turdan ibarət olan viktorina keçirildi. Bakı şəhəri Kərim Kərimov adına 8 nömrəli tam orta məktəbin “Turan” klubu I yerə layiq görüldü. Musiqi istedadı olan şagirdlərin ifasında bədii hissə də nümayiş olundu. Sonda Muzeyin direktoru, akademik Nailə Vəlixanlı tərəfindən viktorinada iştirak edən komandalara sertifikatlar, Muzeyin nəfis tərtibatda nəşr olunmuş elmi nəşrləri və birinci yer tutan “Turan” komandasına Muzeyin illik ailə bileti təqdim edildi.