AMEA Milli Azərbaycan Tarixi Muzeyinin Neqativ fondunda Azərbaycan tarixinin müxtəlif mərhələlərini əks etdirən bir sıra qiymətli fotoşəkillər, neqativlər, fotolentlər mühafizə olunur. Belə neqativlərdən biri də 1918-ci ilə aid ilk Milli Azərbaycan polkuna aiddir (inv. 20210). Muzeyə 2017-ci ildə qəbul edilmişdir. Qeyd edək ki, 1918-ci ildə müsəlman Şərqində ilk demokratik respublika olan Azərbaycan Xalq Cümhuriyyəti yarandıqdan sonra müstəqil dövlətin bütün atributları, o cümlədən Milli Ordumuz da formalaşdırıldı. Həm daşnakların, həm də bolşeviklərin işğalçılıq siyasətinə qarşı mübarizə aparmalı olan Cümhuriyyət hökuməti iyunun 26-da qərar qəbul edərək, Azərbaycanda Milli Ordunun təməlini qoydu və milli dövlətçiliyimizi bütün ölkə ərazisində bərpa etdi.