AMEA Milli Azərbaycan Tarixi Muzeyinin Hədiyyələr və xatirə əşyaları fondunda rus dilində “Azərbaycan Dövlət Türk Bədaye Teatrının SSRİ-yə qastrol səfəri” (İnv. 3046; Bakı, 1930, 48 s.) kitabçası mühafizə olunur. Kitabçada müxtəlif artistlərin şəkilləri, ayrı-ayrı dram əsərləri haqqında mətn və səhnələrdən fotoşəkillər vardır. Kitabça Azərbaycan SSR Xalq artisti, rejissor və aktyor A.A.Tuqanova məxsus olub, onun kolleksiyasına aiddir. Kitabçanın birinci səhifəsində SSRİ MİK-nin sədri Q.Musabəyovun “İnqilab və türk teatrı” mövzusunda giriş məqaləsi verilmişdir. Qalan səhifələrdə teatr xadimlərinin fotoşəkilləri, teatr tamaşalarından səhnələr və onlar haqqında Azərbaycan və rus dillərində kiçik izahedici mətnlər verilmişdir.