Muzey işinin təşkilində və mədəni irsimizin qorunması sahəsində çox işlər görmüş Beynəlxalq Muzeylər Şurası (ICOM) nizamnaməsinə əsasən ICOM-un Beynəlxalq və Milli komitələri hər 3 ildən bir yeni sədr və idarə heyətini seçir. Milli İncəsənət Muzeyində keçirilimiş Beynəlxalq Muzeylər Şurası (ICOM) Azərbaycan Milli Komitəsi rəyasət heyətinin plenar iclasında ICOM Azərbaycan Milli Komitəsinin sədri, Milli Xalça Muzeyinin direktoru Şirin Məlikova qeyd etdi ki, ICOM Azərbaycan Milli Komitəsinin hazırkı sədr və Rəyasət Heyəti 2016-cı ildə seçilib və 2016-2019-cu illər ərzində Milli Komitə tərəfindən aparılan işlər haqqında qurumun 3 illik fəaliyyətinə dair hesabatı iştirakçıların nəzərinə çatdırıb. Milli Komitə son üç il ərzində keçirilmiş bir sıra yerli, regional tədbirlərlə yanaşı, beynəlxalq miqyaslı tədbirlərin həm təşkilatçısı, həm də iştirakçısı olub. Seçki komissiyasının üzvləri AMEA Milli Azərbaycan Tarixi Muzeyinin elmi-fond işləri üzrə direktor müavini Məhfuzə Zeynalova və “İçərişəhər” Muzey Mərkəzinin ekspozisiyalar və beynəlxalq əlaqələr şöbəsinin daimi ekspozisiyalar üzrə sektor müdiri Həcər Alxasova 2019-2022-ci illər üçün Azərbaycan Milli Komitəsinin Rəyasət Heyətinin üzvlüyünə təklif olunan namizədlərin təqdimatını etdilər. Daha sonra səsvermə keçirildi. ICOM Azərbaycan Milli Komitəsinin Rəyasət heyətinə 9 üzv və sədr seçildi. İdarə heyətinə seçilən 9 nəfərdən biri Milli Azərbaycan Tarix Muzeyinin direktoru, akademik Nailə Vəlixanlıdır.