AMEA Milli Azərbaycan Tarixi Muzeyinin Sənədli Mənbələr Fondunda 28 may 1919-cu il tarixinə aid müstəqilliyimizin ildönümünü əks etdirən fotoşəkil (inv. № 1602) mühafizə edilir. Şəkildə gənc Cümhuriyyətin ilk paytaxtı olmuş Gəncə şəhərində istiqlalımızın ildönümünü qeyd etmək məqsədilə toplanan Baş nazir Nəsib bəy Yusifbəylini və ölkənin digər nüfuzlu simalarını, görkəmli ictimai-siyasi xadimləri və sənət adamlarını görürük. Şəkildə ön cərgədə Məşədi Cəmil Əmirov və cavan xanəndə Bülbül, II sırada soldan 5-ci - Nəsib bəy Yusifbəyli, 6-cı - parlamentin sədr müavini Həsən bəy Ağayev, 7-ci - hökumətin mətbu orqanı olan “Azərbaycan” qəzetinin rus dilindəki nəşrinin redaktoru Şəfi bəy Rüstəmbəyov, 9-cu - hərbi kəşfiyyatın yaradıcısı Nağı bəy Şeyxzamanlı təsvir edilmişdir. Nağı bəyin arxasında sonradan dövlət himnimizə çevrilmiş “Azərbaycan marşı”nın mətninin müəllifi, şair Əhməd Cavadı görmək olar. Şəkil Cümhuriyyət tariximizin tədqiqi baxımından əhəmiyyətlidir.