Etnoloq Michael Tschanzın rəhbərlik etdiyi bir qrup isveçrəli “Azərbaycanı tanımaq və təbliğ etmək” layihəsi çərçivəsində Milli Azərbaycan Tarixi Muzeyini ziyarət edib və muzeyin direktoru, akademik Nailə Vəlixanlı ilə görüşüblər. M.Tschanz Azərbaycanın dostu olduğunu, 1990-cı illərdə Beynəlxalq Qırmızı Xaç Cəmiyyətinin tərkibində Azərbaycanda xidmət etdiyini, məqsədinin Azərbaycanı öz ölkəsində tanıtmaq olduğunu deyib. Ziyarətin qayəsi Azərbaycan mədəniyyətini, incəsənətini, tarixini, ədəbiyyatını daha yaxından öyrənmək və Avropada təbliğ etməkdir. Nailə xanım qonaqlara muzeyin tarixi, fondları haqqında məlumat verib, H.Z.Tağıyevin xeyriyyəçilik fəaliyyətindən bəhs edib. Azərbaycanda xalqlar dostluğu və tolerantlıq ənənələrinin güclü olduğunu deyən Nailə xanım, bunun Azərbaycanın Dövlət Bayrağında əks olunduğunu, islam, türklük və müasirliyin bir sintez şəklində mədəniyyətimizdə yer aldığını bildirib. H.Z.Tağıyevin xatirə muzeyi ilə tanış olan qonaqlara Azərbaycanın tarixi, muzeyin eksponatları, H.Z.Tağıyevin həyatı haqqında geniş məlumat verilib. Sonda akademik Nailə Vəlixanlı isveçrəli qonaqlara muzeyin nəfis tərtibatlı incilərini hədiyyə edib və muzeyin gələn il keçiriləcək 100 illik yubileyi tədbirinə dəvət edib.