AMEA Milli Azərbaycan Tarixi Muzeyinin elmi işçisi Sahibə Ələkbərova Azərbaycan Dövlət Mədəniyyət və İncəsənət Universitetində “Muzeyşünaslıq” ixtisası üzrə ixtisaslaşan II kurs tələbələri üçün mühazirə deyib. Mühazirə Milli Azərbaycan Tarixi Muzeyində fəaliyyət göstərən “Gənc muzeyşünaslar və muzeysevərlər klubu”nun məqsədi və vəzifələri mövzusunda olub. S.Ələkbərova muzeyin direktoru, akademik Nailə Vəlixanlının muzeydə tələbələrin maariflənməsinə xüsusi diqqət ayırdığını, muzeydə onlar üçün lazımi şəraitin yaradılmasını qeyd edib. Klubun 2017-ci ildə fəaliyyətə başladığını, 2018-ci ilin dekabrında 29 üzvə tədbirlərdəki aktivliyinə görə muzey tərəfindən sertfikatlar verildiyini bildirib. Həmçinin, 2020-ci il üçün kluba yeni üzvlərin qəbulunun başladığı tələbələrin diqqətinə çatdırılıb. “Muzeyşünaslıq” kafedrasının müdiri, pedaqogika üzrə fəlsəfə doktoru dosent Yeganə Eyvazova da çıxış edərək, “Gənc muzeyşünaslar və muzeysevərlər klubu”nun tələbələrin praktiki inkişafında böyük əhəmiyyətini vurğulayıb. Tələbələrin kluba üzv olmalarını tövsiyə edib. Sonda 14 tələbə kluba üzv yazılmaq üçün S.Ələkbərovaya müraciət edib.