20 - 22 noyabr 2019-cu ildə Milli Azərbaycan Tarixi Muzeyinin elmi işlər üzrə direktor müavini, t.ü.e.d., dos. Nərgiz Əliyeva, “Silahlar və bayraqlar” Fondunun müdiri, t.ü.f.d., dos. Sevinc Vahabova və “Numizmatika və epiqrafika” elmi-fond şöbəsinin b.e.i., t.ü.f.d. Aygün Məmmədova Rusiya Federasiyası Tatarıstan Respublikasının Bulqar şəhərindəki Bulqar İslam Akademiyasında keçirilmiş Beynəlxalq elmi-praktiki konfransda məruzəçi kimi iştirak ediblər. Konfrans “Milli ilahiyyat məktəbinin yaranması və inkişafı kontekstində islamşünaslıq tədqiqatları təcrübəsi” mövzusunda olub. Dosent Nərgiz Əliyeva “Azərbaycanın müsəlman elm və təhsil xadimlərinin Xilafətin mədəni mərkəzlərində fəaliyyəti”; dosent Sevinc Vahabova “Türk xalqlarının silahsazlıq ənənələrinə İslamın təsiri”; t.ü.f.d. Aygün Məmmədova “MATM-nin Numizmatika Fondunda qorunan Cuçi sikkələrindən ibarət dəfinələr islamşünaslığın faktiki mənbəyi kimi” mövzularında məruzələrlə çıxış ediblər. A.Məmmədova tərəfindən Bulqar İslam Akademiyasının tədris işləri üzrə prorektoru Aleksey Petrova MATM-nin elmi nəşrləri hədiyyə edilib. Konfrans iştirakçıları Məhəmməd peyğəmbərin həyat və fəaliyyətinə həsr edilmiş yarışmada iştirak edib, verilən sualları cavablandırıblar. Sonda konfrans iştirakçıları Bulqar İslam Akademiyası yaxınlığındakı Ağ Məscidi ziyarət edib, Bulqar Sivilizasiyası Muzeyi və Bulqar Dövlət Tarix-Memarlıq Muzey-Qoruğuna olan ekskursiya nəticəsində zəngin məlumatlar əldə ediblər. Konfrans məruzələrinin nəşr edilməsi nəzərdə tutulub.