Milli Azərbaycan Tarixi Muzeyində Elmi-ekspozisiya və sərgilərin təşkili şöbəsinin elmi işçisi İnna Kostinanın 75 illik yubileyinə həsr edilən yığıncaq keçirilib. Tədbirdə muzeyin direktoru, akademik Nailə Vəlixanlı, Elmi katib, t.ü.f.d., dosent Fərhad Cabbarov, Kadrlar şöbəsinin müdiri Gülşən Əliyeva, Həmkarlar Təşkilatının sədri, həmçinin şöbənin elmi işçisi İnarə Muradəliyeva və şöbə əməkdaşları işrirak ediblər. Nailə Vəlixanlı tədbirin təşkilatçıları – Elmi-ekspozisiya və sərgilərin təşkili şöbəsinin müdiri, t.ü.f.d., dosent Səbuhi Əhmədov, eləcə də şöbə əməkdaşlarına fəal, məsuliyyətli işlərinə görə təşəkkür edib. N.Vəlixanlı İ.Kostinanın elmi fəaliyyətindən danışıb, ona uğurlar dilədi. Sonra yubilyara muzeyin gümüş xatirə medalı təqdim olunub. Yığıncaqda bildirilib ki, İ.Kostina 54 ilə yaxındır ki, muzeydə çalışır. Zal baxıcısı vəzifəsindən elmi işçi vəzifəsinə qədər yüksələn İ.Kostina muzey mütəxəssisi kimi püxtələşib. O, muzey materialları əsasında bir neçə elmi məqalənin müəllifidir, muzeydə material toplaması işində fəal iştirak edib. İ.Kostina ona göstərilən diqqətə görə müdiriyyətə minnətdarlığını bildirib, muzeydə işlədiyi müddət ərzində baş verən xoş xatirələri ilə bölüşüb. Muzeyin Həmkarlar Təşkilatı da yubilyarı təbrik edib, ona xatirə hədiyyə təqdim edib.