Noyabrın 23-də Moskvanın Xalq Təsərrüfatı Nailiyyətləri Sərgisindəki “Azərbaycan” pavilyonunun əsaslı bərpa və təmirdən sonra açılış mərasimi olub. Pavilyonun açılışı ərəfəsində Heydər Əliyev Fondu tərəfindən “Azərbaycan” pavilyonunun tarixini əks etdirən “XTNS. “Azərbaycan” pavilyonu. 1939-2019” adlı kitab nəşr olunub (rus dilində “ВДНХ. Павильон «Азербайджан». 1939-2019”. Баку, 2019, 199 стр.). Kitabın hazırlanması və nəşri üzrə layihənin rəhbəri Anar Ələkbərov, koordinatoru Ülviyə Qasımova, məsləhətçi Rəşad Kərimov idi. Kitabın mətninin müəllifi Muzeyin şöbə müdiri tarix üzrə fəlsəfə doktoru, dosent Səbuhi Əhmədovdur. Azərbaycan və Rusiya arxivlərinin, eləcə də mövcud elmi ədəbiyyat əsasında yazılmış kitabda XTNS-dakı “Azərbaycan” pavilyonunun 1939-cu ildən keçidiyi bütün tarix əks olunmuşdur. Burada həmçinin pavilyonun Heydər Əliyev Fondu tərəfindən həyata keçirilmiş kompleks bərpa işlərinin mərhələləri, eləcə də pavilyonun müasir görünüşünü əks etdirən fotoşəkillər yer almışdır. Qeyd etmək lazımdır ki, kitab noyabrın 23-də “Azərbaycan” pavilyonunun əsaslı bərpa və təmirdən sonra açılış mərasimində iştirak etmiş bütün qonaqlara hədiyyə edilmişdir.