AMEA Milli Azərbaycan Tarixi Muzeyinin direktoru, akademik Nailə Vəlixanlı və Elmi Fond işləri üzrə direktor müavini, t.ü.f.d., dosent Məhfuzə Zeynalova Çində İpək Yolu Muzeylərinin Beynəlxalq Alyansının (İYMBA) II Forumunda iştirak etmişlər. Çin Milli Muzeyinin təşkilatçılığı ilə keçirilən bu Forumda Çin, Serbiya, Miyama, Azərbaycan və Qazaxıstan muzeylərinin nümayəndələri iştirak ediblər. Forumun keçirilməsinin məqsədi İpək Yolu üzərində olan muzeylərin fəaliyyətini genişləndirmək, birgə əməkdaşlıq şəraitində və təqdim olunan müvafiq layihələr əsasında iş birliyi qurmaqdır. Tədbirdə iştirak edən muzey rəhbərləri rəhbərlik etdikləri muzeylərin müasir durumu haqqında məlumat vermiş, layihələrlə bağlı təkliflər irəli sürmüşlər. İpək Yolu üzərində olan Muzeylərin Beynəlxalq Alyansının vitse-prezidenti, akademik Nailə Vəlixanlı çıxış edərək muzeyin digər muzeylərlə əlaqələrindən və bu sahədə əldə olunan nailiyyətlər haqqında məruzə etmişdir. N.Vəlixanlı muzeyin kolleksiyası, o cümlədən İpək Yoluna dair eksponatlar haqqında məlumat vermişdir. Bildirib ki, 100 yaşını qeyd etmək ərəfəsində muzey beynəlxalq əlaqələrini daha da genişləndirir və bu məqsədlə bir sıra ölkələr, o cümlədən Qazaxıstan, Rusiya, Özbəkistan və b. yerlərin muzeyləri ilə iş birliyi yaradır. Tədbirdə muzey rəhbərləri arasında gələcək əməkdaşlıq haqqında danışıqlar aparılıb. Muzeylərarası səyyar sərgilərin keçirilməsi, elmi, kadr təcrübə mübadiləsinin aparılması, eksponatların qorunub mühafizəsi və müasir bərpa, konservasiya texnologiyalarının tətbiqi məsələləri müzakirə olunub.