Azərbaycan Respublikası Prezidentinin 2019-cu ildə Bakı Dövlət Universitetinin 100 illik yubileyinin keçiriməsi ilə bağlı 2017-ci il 14 noyabr tarixində imzaladığı sərəncama əsasən Milli Azərbaycan Tarixi Muzeyində BDU-ya həsr olunmuş guşə təşkil olunub. Guşədə muzeyin fondlarında qorunan Universitetin fəaliyyətini əks etdirən bir sıra eksponatlar yerləşdirilib. Vitrində Bakı Dövlət Universitetinin 1919-cu ildə hazırlanmış ilk möhürü, 1919-cu ildə verilmiş vəsiqələr, 1924-cü ildə BDU-nun verdiyi ilk diplomlardan biri və b. materiallar nümayiş olunub. Stendlərdə Universitetin fəaliyyəti ətraflı əks olunub. Bakı Dövlət Universiteti 1919-cu il sentyabrın 1-də Azərbaycan Xalq Cümhuriyyətinin parlamenti tərəfindən təsis edilmişdir. Azərbaycan Respublikasının Prezidenti BDU-nun yaradılmasını müsbət qiymətləndirmiş və demişdir ki, "Azərbaycan Xalq Cümhuriyyətinin yadigarı Bakı Dövlət Universiteti müsəlman Şərqində yeni tipli ilk ali məktəb kimi yarandığı vaxtdan etibarən nailiyyətlərlə zəngin şərəfli bir yol keçmişdir. Bakı Dövlət Universiteti tarixən vətənpərvər ziyalıların fədakar əməyi sayəsində yetirdiyi ictimai-siyasi, elm və mədəniyyət xadimləri ilə Azərbaycanın mövcud simasının təşəkkülünə böyük töhfələr vermişdir". BDU-nun təşəkkülü xalqımızın tarixində ən əlamətdar hadisələrdən biridir və muzeydə bu əlamətdar tarix qeyd olunur.