AMEA Milli Azərbaycan Tarixi Muzeyinin YAP Səbail “Azərbaycan tarixçiləri” ilk ərazi təşkilatı tərəfindən Azərbaycan xalqının ümummilli lideri Heydər Əliyevin vəfatının 16-cı ildönümünə həsr edilmiş “Əbədiyaşar lider” adlı tədbir keçirilib. Dövlət Himni səsləndirildikdən sonra tədbirin rəsmi hissəsində çıxış edən YAP Səbail “Azərbaycan tarixçiləri” ilk ərazi təşkilatının sədri Pərvanə Əzimova iştirakçıları salamladı. Tədbirin məqsədi və muzeydə YAP “Azərbaycan tarixçiləri” ilk ərazi təşkilatının fəaliyyəti haqqında qısa məlumat verdi. Ümummilli liderin və şəhidlərimizin əziz xatirəsi bir dəqiqəlik sükutla yad edildikdən sonra P.Əzimova “Heydər Əliyev və müstəqil Azərbaycan” mövzusunda məruzə ilə çıxış etdi. Ulu öndərə aid “Ömür yolu” filmi izlənildikdən sonra Milli Fədailər Hərəkatının katiblik müdiri Gülnarə Əmirova çıxış edib, ümummilli liderin fəaliyyətinin gənc nəslə örnək olduğunu vurğuladı. Daha sonra muzeyin əməkdaşları - şöbə müdiri, t.ü.f.d. Nasir Quluzadə “Ulu öndərin Azərbaycan dövlətçilik ənənələrinin qorunmasında rolu”; b.e.i., t.ü.f.d. Əli Fərhadov “Heydər Əliyev və azərbaycançılıq”; b.e.i., t.ü.f.d. Aygün Məmmədova “Numizmatik, filatelistik və faleristik materiallarda Heydər Əliyev obrazı”; elmi işçi Şəfa Mövsümov “İkinci Dünya Müharibəsində azərbaycanlıların iştirakı və Heydər Əliyevin azərbaycançılıq ideologiyası”; mütəxəssis Qənirə Qafarlı “Heydər Əliyev və bir sənədin izi ilə” adlı məruzələrlə çıxış etdilər. Tədbirin bədii hissəsində Səbail rayonu H.Mahmudbəyov adına 2 saylı texniki-humanitar liseyin VII sinif şagirdi Amil Manafov Azərbaycan bayrağına həsr edilmiş şeiri səsləndirdi. Tədbirdə həmçinin YAP “Gənc Tamaşaçılar” ilk ərazi təşkilatının sədri Ramilə Muradova, muzeyin digər əməkdaşları, YAP “Azərbaycan tarixçiləri” ilk ərazi təşkilatının üzvləri - t.ü.f.d. Tural Şiriyev, Aybəniz Hacıyeva, Gülnar Fərhadova, Vüqar Xudaverdiyev və H.Mahmudbəyov adına 2 saylı texniki-humanitar liseyin Uşaq Birliyi rəhbəri Turac Əhmədova da iştirak ediblər.