AMEA Milli Azərbaycan Tarixi Muzeyinin Elmi-kütləvi iş və təhsil şöbəsinin təşkilatçılığı ilə S.C.Pişəvəri adına Respublika Humanitar Fənlər Gimnaziyasında ümummilli lider Heydər Əliyevin anım günü ilə əlaqədar “Ulu öndər Heydər Əliyev və mənəvi dəyərlər” adlı tədbir keçirilib. Tədbirdə muzey əməkdaşları, S.C.Pişəvəri adına Humanitar Fənlər Gimnaziyasının müəllim-şagird kollektivi,Təhsil Nazirliyi Respublika Uşaq Gənclər İnkişaf Mərkəzinin əməkdaşları və Bakı Dövlət Universitetinin əməkdaşları iştirak edib. Ulu öndərin əziz xatirəsinin bir dəqiqəlik sükutla yad edilməsindən sonra tədbiri giriş sözü ilə açan gimnaziyanın direktoru İlqar Talıbov müstəqil Azərbaycan dövlətinin qurucusu, dünya şöhrətli siyasi xadim Heydər Əliyevin vəfatından on altı il keçdiyini xatırladıb. Zəngin dövlətçilik təcrübəsi, fenomenal siyasi bacarığı ilə fərqlənən Heydər Əliyevin hələ sağlığında canlı əfsanəyə çevrildiyini və müstəqil Azərbaycanı bütün dünyada şərəf və ləyaqətlə təmsil etdiyini bildirib. Sonra Muzeyin aparıcı elmi işçisi, t.ü.f.d Bəhman Kərimov, Bakı Dövlət Universitetinin dosenti, t.ü.f.d. Arzu Xəlilzadə, Muzeyin mütəxəssisi Qənirə Qafarlı Heydər Əliyevin Azərbaycanın dövlət müstəqilliyinin möhkəmləndirilməsində müstəsna rolundan danışıblar. Çıxışçılar dahi rəhbərin yürütdüyü uzaqgörən daxili və xarici siyasət nəticəsində ölkəmizin tərəqqi etdiyini qeyd ediblər. Ulu öndər Heydər Əliyevin elm və mədəniyyətə geniş ürəklə qayğı göstərməsi, xalqımızın əsrlər boyu yaratdığı mənəvi dəyərlərin qorunması və daha da zənginləşdirilməsi üçün əməyini əsirgəmədiyi bildirilib. Bu gün bu ənənə Heydər Əliyevin layiqli davamçısı, Azərbaycan Respublikasının Prezidenti cənab İlham Əliyev tərəfindən uğurla davam etdirilir. Sonra məktəblilərin iştirakı ilə bədii hissə keçirilib. Ulu öndər Heydər Əliyevin şərəfli həyat və fəaliyyəti haqqında film nümayiş olunub.