AMEA Milli Azərbaycan Tarixi Muzeyində “Yeniləşən Azərbaycan və gənclik” adlı tədbir keçirilib. Muzeyin YAP Səbail rayonu “Azərbaycan tarixçiləri” ilk ərazi təşkilatı ilə “Milli Fədailər Hərəkatı”nın təşkilatçılığı ilə keçirilən tədbir Dövlət Himninin səsləndirilməsi ilə başladı. “Gənclər siyasəti” filmi nümayiş etdirildi. Sonra muzeyin Elmi-kütləvi iş və təhsil şöbəsinin baş mütəxəssisi, YAP “Azərbaycan tarixçiləri” ilk ərazi təşkilatının sədri Pərvanə Əzimova iştirakçıları salamladı. “İnamla, İlhamla qələbəyə doğru” adlı məruzə ilə çıxış edib, tədbirin önəmi barədə məlumat verdi. Azərbaycan Respublikasının Prezidenti İlham Əliyevin qayğı və diqqəti sayəsində son illərdə azərbaycanlı gənclərin mühüm uğurlara nail olduğunu, bacarıq və imkanlarının yeni səviyyəyə çatdığını və hüquqlarının artdığını vurğuladı. Daha sonra muzey əməkdaşları - Numizmatika və epiqrafika elmi fond şöbəsinin böyük elmi işçisi, t.ü.f.d. Aygün Məmmədova, Gənc Alim və Mütəxəssislər Şurasının sədri, t.ü.f.d. Sevinc Nəsirova, Elmi-kütləvi iş və təhsil şöbəsinin əməkdaşı Zümrüd İsmayılova, həmçinin “Milli Fədailər Hərəkatı”nın sədri Fuad Muradov, təşkilatın üzvləri - Akif Səfərov, Böyükbəy Əliyarbəyov və Zülfiyyə Nuriyeva çıxış etdilər. Dövlət başçısının mədəni irsin qorunması, gənclərlə iş və idman siyasətində olan fəaliyyətindən bəhs edib, yeni nəsil üçün yüksək sosial rifah və insan kapitalı inkişafının təmin edildiyini vurğuladılar. Cənab Prezidentin gənclər siyasətini alqışladıqlarını bildirdilər. Sonda Bakı Musiqi Akademiyasının doktorantı Rüfət Piriyevin canlı ifasında “Heydərimiz” mahnısı (sözləri: Gülər Əlvan qızı; bəstə: Aytən İbrahimova) səsləndirildi.