Xəzər rayon Mərkəzləşdirilmiş Kitabxana Sisteminin oxu zalında şəhid Rahib Məmmədova həsr edilmiş tədbirdə AMEA Milli Azərbaycan Tarixi Muzeyinin elmi işçisi Sahibə Ələkbərova iştirak edib. O, öz çıxışında Ağdam rayonu Mahrızlı kəndində fəaliyyətini davam etdirən Rahib Məmmədov adına Döyüş Şöhrəti Muzeyi haqqında məlumat verib. Muzeyin gənc nəslin vətənpərvərlik ruhunda tərbiyə olunmasında xüsusi rolu olduğunu vurğulayıb. S.Ələkbərova Xəzər Mədəniyyət İnternet TV kanalına müsahibə verərək, qəhrəmanın 11 ədəd şəxsi əşyasının müvvəqqəti olaraq Azərbaycan İstiqlal Muzeyinin fondunda qorunduğunu qeyd edib. Bu əşyalar içərisində onun əsgər mundiri və "Qırmızı ulduz" ordeni olduğunu bildirib. S. Ələkbərova qeyd edib ki, bu əşyaların yaxın vaxtlarda qəhrəmanın adını daşıyan Döyüş Şöhrəti Muzeyinə qaytarılması nəzərdə tutulub. Rahib Məmmədov 1967-ci ildə Ağdam rayonunun Mahrızlı kəndində anadan olub. 1987-ci ildə hərbi xidmət keçdiyi Gürcüstanın Xobi rayonunun Çaladidi kəndində böyük fədakarlıq və qəhrəmanlıq göstərərək, təbii fəlakət zamanı 28 sakini seldən xilas edib və qəhrəmanlıqla həlak olub. Ölümündən sonra SSRİ Ali Soveti Rəyasət Heyətinin 22 iyul 1987-ci il tarixli Fərmanı ilə "Qırmızı Ulduz" ordeni ilə təltif edilib. R.Məmmədovun bu şücaəti Azərbaycan və Gürcüstan xalqları arasında dostluq münasibətlərinin timsalına çevrilib. Yerli sakinlər hələ də baş verən fəlakət zamanı azərbaycanlı əsgərin qəhrəmanlığından danışır, onun xatirəsini həmişə əziz tuturlar. R.Məmmədov həlak olan gün kənddə doğulmuş oğlan uşağını qəhrəmanın şərəfinə Rahib adlandırıblar.