Milli Azərbaycan Tarixi Muzeyinin Sənədli mənbələr fondunda “Məktəb” jurnalının bir nüsxəsi (1912, №17, əski əlifba ilə) mühafizə olunur (inv. № 4410). “Məktəb” jurnalı Bakıda türk (Azərbaycan) dilində nəşr olunurdu. Jurnalın ilk nömrəsi 1911-ci il noyabrın 29-da, sonuncusu 1920-ci il martın 21-də çıxmışdır. Cəmi 95 nömrə işıq üzü görmüşdür. Məktəblilərə xitab edən bu jurnal iki həftədə bir dəfə nəşr olunan "əxlaqi, ədəbi, fənni, müsəvvir (rəsmli) məcmuə" idi. Jurnalın redaktor və naşiri Qafur Rəşad Mirzəzadə və Əbdürrəhman Əfəndizadə idi. "Məktəb" jurnalı XX əsrin əvvəllərində şagirdlərin bilik və dünyagörüşünün genişlənməsində, elmə, maarifə həvəslərinin artmasında, əxlaqi inkişafında müsbət rol oynamışdır.