Milli Azərbaycan Tarixi Muzeyinin fondlarında XX əsrin əvvəllərinə aid bir sıra qəzet və jurnallar saxlanılır. Bunlara muzeyin Sənədli mənbələr fondunda olan bolşevik mətbuatı nümunələrini - “Dəvət-Qoç” (№1, 26 may 1906-cı il, Azərbaycan və erməni dillərində) və “Кавказский рабочий листок” (4 (17) dekabr, 1905-ci il, rus dilində) qəzetlərini göstərə bilərik. Həmçinin Neqativ fondunda “Hümmət” sosial-demokrat təşkilatının rəhbər xadimləri olan N.Nərimanov, M.Əzizbəyov və S.M.Əfəndiyevin “Hümmət” qəzetinin redaksiyasında birgə əks olunduqları rəsm əsərinin neqativi (İnv.№5232) saxlanılır. Bu materiallar Azərbaycanın sovet dövrü tarixinin tədqiqi baxımından böyük əhəmiyyətə malikdir.