Bu gün Azərbaycan Xalq Cümhuriyyətinin banilərindən biri olan M.Ə.Rəsulzadənin anım günüdür. Axund Hacı Molla Ələkbər oğlu Məhəmməd Əmin Rəsulzadə (31 yanvar 1884, Novxanı, Bakı – 6 mart 1955, Ankara) – ictimai-siyasi xadim, siyasətçi və publisist, Azərbaycan Xalq Cümhuriyyətinin (1918-1920) banilərindən və Azərbaycan siyasi mühacirətinin liderlərindən biridir. Azərbaycan tarixinin ən görkəmli və böyük şəxsiyyətlərindən olub, Azərbaycan milli istiqlal hərəkatına başçılıq etmiş, İranda şah rejiminə qarşı demokratik hərəkata dəstək olmuşdur. Onun "Bir kərə yüksələn bayraq, bir daha enməz!" ifadəsi XX əsrdə Azərbaycanda müstəqillik hərəkatının şüarı olmuşdur. Qeyd edək ki, Milli Azərbaycan Tarixi Muzeyinin fondlarında M.Ə.Rəsulzadənin həyat və yaradıcılığını əks etdirən bir çox materiallar qorunur. O cümlədən, Sənədli mənbələr fondunda M.Ə.Rəsulzadənin üç kitabı (inv. № 665/2/3/4) - “Şəkli-idarə haqqında iki baxış” (Bakı, 1917, Azərbaycan dilində), “Panturanizm haqqında” (Paris, 1930, rus dilində), “Əsrimizin Səyavuşu” (Ankara, 1989, türk dilində) və M.Ə.Rəsulzadənin azərbaycanlı mühacir Süleyman Təkinərə Türkiyədə yaşadığı dövrdə yazdığı məktublar (inv. № 4548-4587) saxlanılır. Adı çəkilən məktub və əsərlər AXC və mühacirət dövrü tariximizin tədqiqi və təbliği baxımından əhəmiyyətlidir.