Milli Azərbaycan Tarixi Muzeyinin Sənədli mənbələr fondunda (inv. 2535-2546) və Xəritələr sektorunda (inv. 93) görkəmli ictimai-siyasi xadim və milli mədəniyyətimizin tanınmış siması Ceyhun Hacıbəyliyə (1891-1962) məxsus maraqlı materiallar saxlanılır. O, cümhuriyyət hökumətinin mətbu orqanı olan “Azərbaycan” qəzetinin redaktoru olmuş, daha sonra vəzifəsini qardaşı Üzeyir bəyə təhvil verərək Azərbaycan nümayəndə heyətinin tərkibində Paris Sülh Konfransına yollanmışdır. Aprel işğalından sonra mühacir həyatını yaşamağa məcbur olan C.Hacıbəyli ömrünün sonunadək həm siyasət, həm də mədəniyyət sahəsində fəaliyyətini davam etdirmişdir. Muzeyin fondundakı materiallar onun həmin dövrə aid fotoşəklindən (İnv. 2535), türk, fransız və ingilis dillərində qələmə aldığı hekayələrinin əl və makina yazılarından (İnv. 2540), digər azərbaycanlı mühacir Qalib Amaməlibəyovun ona göndərdiyi məktubdan (İnv. 2545), habelə Azərbaycan nümayəndə heyətinin 1919-cu ildə Paris Konfransı üçün fransız dilində tərtib etdiyi Azərbaycan Cümhuriyyətinin xəritəsi (İnv. 2547) və 1923-24-cü illər Lozanna Konfransına rusca təqdim etdiyi cümhuriyyətin Dövlət Bankı haqqında məlumatdan (İnv. 2546) ibarətdir. Bu materiallar cümhuriyyət tariximizin və C.Hacıbəyli irsinin tədqiq və təbliği baxımından əhəmiyyətlidir.