Milli Azərbaycan Tarixi Muzeyi eksponatların toplanması, təbliği, elmi-tədqiqat işlərilə yanaşı elmi-kütləvi nəşrlərə də üstünlük verir. Bu istiqamətdə 2020-ci ildə Muzeyin 100 illiyinə həsr olunmuş bəzi nəşrləri olmuşdur ki, bu haqda sizlərə məlumat vermək istəyirik: 1. Muzeyin direktoru, akademik Nailə Vəlixanlının elmi redaktorluğu və t.ü.f.d., dosent Məhfuzə Zeynalovanın müəllifliyi ilə nəşr olunmuş Azərbaycan dilində “Əlifba” kitabı (Bakı, Elm və təhsil, 2020, 71 s.). Uşaq və yeniyetmələrə, o cümlədən yaşlılara xitab edən kitabda Azərbaycanın qədim tarix, maddi-mədəniyyət nümunələrinin, məişətdə işlənən müxtəlif əşyaların fotoşəkilləri və haqqında məlumat verilir. Onların artıq dilimizdən çıxmış, anaxronizmə çevrilmiş adları yadımıza salınır. 2. Akademik Nailə Vəlixanlının elmi redaktorluğu və t.ü.f.d., dosent Fərhad Cabbarovun müəllif və tərtibatçılığı ilə Azərbaycan və rus dillərində nəşr olunmuş “Hacı Zeynalabdin Tağıyev fotoşəkillərdə” albomu (Bakı, Elm və təhsil, 2020, 72 s.). Albomda görkəmli Azərbaycan xeyriyyəçisi, “millət atası” H.Z.Tağıyevin həyat və fəaliyyətini əks etdirən müxtəlif fotoşəkillər və haqqında məlumat verilir. 3. Akademik Nailə Vəlixanlının elmi redaktorluğu və t.ü.f.d., dosent Səbuhi Əhmədovun müəllifliyi ilə Azərbaycan və rus dillərində nəşr olunmuş “Üçtəpə kurqanındakı alban döyüşçüsü” kitabı (Bakı, Elm və təhsil, 2020, 24 s.). Kitabda Azərbaycanın Mil düzündəki Üçtəpə kurqanında arxeoloji qazıntılar zamanı aşkar olunmuş unikal artefaktlar haqqında məlumat verilir. Əksəriyyəti muzeyimizdə qorunan bu artefaktlar kurqanda dəfn edilmiş erkən orta əsr Qafqaz Albaniyası döyüşçüsünün türk tayfasından olduğunu sübut edir. Kitab mütəxəssislər və geniş oxucu kütləsi üçün nəzərdə tutulub. 4. Akademik Nailə Vəlixanlının elmi redaktorluğu və t.ü.f.d., dosent Sevinc Vahabovanın müəllifliyi ilə Azərbaycan və ingilis dillərində nəşr olunmuş “Azərbaycan şəhərlərinin açarları” kitabçası (Bakı, Elm və təhsil, 2020, 12 s.). Kitabçada muzeyin Silahlar və bayraqlar fondunda qorunan Azərbaycan şəhərlərinin tarixi açarları haqqında məlumat və fotoşəkillər təqdim edilib. 5. Akademik Nailə Vəlixanlının elmi redaktorluğu və t.ü.f.d. Aida İsmayılovanın müəllifliyi ilə Azərbaycan və ingilis dillərində nəşr olunmuş “Sehrli çıraq” kitabçası (Bakı, Elm və təhsil, 2020, 24 s.). Kitabçada muzeyin işıqlandırma vasitələrindən ibarət kolleksiyasında yer alan müxtəlif yerli və xarici, tarixi çıraqlar haqqında məlumat və fotoşəkillər təqdim edilib. 6. Akademik Nailə Vəlixanlının elmi redaktorluğu və t.ü.f.d., dosent Gülzadə Abdulovanın müəllifliyi ilə Azərbaycan və ingilis dillərində nəşr olunmuş “Gözəllik ondur...” kitabı (Bakı, Elm və təhsil, 2020, 44 s.). Kitabda tarixi geyim mədəniyyətimiz, milli qadın geyimlərimiz haqqında məlumat və fotoşəkillər təqdim edilib. 7. Akademik Nailə Vəlixanlının elmi redaktorluğu və Fikrət Bağırovun müəllifliyi ilə Azərbaycan və ingilis dillərində nəşr olunmuş “Azərbaycan Dmitri Yermakovun fotoşəkillərində” kitabı (Bakı, Elm və təhsil, 2020, 24 s.). Kitabda məşhur rus fotoqrafı D.Yermakovun həyat və fəaliyyəti haqqında məlumat və Azərbaycanla bağlı çəkdiyi fotoşəkillər təqdim olunub. Qeyd edək ki, bu yeni nəşrlər Muzeyin Elmi Şurasının qərarı ilə çap olunub.