Milli Azərbaycan Tarixi Muzeyində ilk arxeoloqlarımızdan biri, tanınmış muzey təşkilatçısı, pedaqoq, coğrafiyaşünas Davud bəy Şərifova aid fotoşəkillər (SMF. İnv. 411/1,2,3) qorunur. 2017-ci ildə Muzeyin direktoru, akademik Nailə Vəlixanlının elmi redaktorluğu, t.ü.e.d. Nərgiz Əliyevanın, t.ü.f.d. Nasir Quluzadənin və Emin Məmmədovun həmmüəllifliyi ilə "Davud bəy Şərifov" kitab-albomu nəşr olunmuşdur. D.Şərifovun 130 illiyinə həsr olunmuş kitab-albomda görkəmli alimin həyat və yaradıcılığı haqda geniş məlumat və foto təsvirlər verilmiş, arxiv sənədlərindən, o cümlədən muzeyin arxiv materiallarından istifadə olunmuşdur. Davud bəy Şərifov xalqımızın tarixi mirasının öyrənilməsi və təbliğinə böyük töhfələr verib. O, sovet dövründə – milli tarixi yaddaşın qorunması və araşdırılmasına ciddi maneələrin olduğu bir zamanda bu sahədə mühüm uğurlara imza atıb. Qeyd edək ki, XX əsrin 20-ci illərində Azərbaycanda muzey işinin təşəkkülü və inkişafına verdiyi dəstək Davud bəy Şərifovun ən böyük xidmətlərindən biridir. Azərbaycan elminin arxeologiya, etnoqrafiya və coğrafiya sahələrinin inkişafına, eləcə də maddi və mənəvi mədəniyyətimizin öyrənilməsinə böyük töhfələr vermiş görkəmli alimin xatirəsi bir zamanlar direktoru olduğu Milli Azərbaycan Tgarixi Muzeyində qorunur və təbliğ edilir.