1950-ci ildə BMT Baş Assambleyası tərəfindən 1 İyun - Uşaqların Beynəlxalq Müdafiəsi Gününün qeyd olunması qərara alınıb. Həmin gün təşkil olunan "Qadınların Beynəlxalq Konfransı"nda uşaq hüquqlarının təmin edilməsi ilə bağlı təkliflər səslənib və 1 iyun tarixini uşaqların beynəlxalq müdafiəsinə həsr etmək qərarı verilib. Bundan sonra iyunun 1-i Uşaqların Beynəlxalq Müdafiəsi Günü kimi tarixə düşüb. Ölkəmizdə uşaqların sosial və hüquqi müdafiəsi ilə bağlı məsələlər Konstitusiya, qanunverici və normativ-hüquqi aktlarla nizamlanır. Uşaq hüquqlarının müdafiəsi ilə bağlı Azərbaycanda qanunvericilik bazası təşkil edilib, 19 may 1998-ci il tarixində “Uşaq hüquqları haqqında” qanun və bəzi digər normativ-hüquqi aktlar qəbul edilib. Azərbaycan Respublikasının Prezidenti İlham Əliyevin 22 dekabr 2008-ci il tarixli sərəncamı ilə 2009-cu il ölkəmizdə "Uşaq ili" elan olunmuşdur. 1 iyun - Uşaqların Beynəlxalq Müdafiəsi Günü bütün dünyada olduğu kimi Azərbaycanda da qeyd edilir. Milli Azərbaycan Tarixi Muzeyində də bu tarixlə bağlı müxtəlif tədbirlər, onlayn layihələr həyata keçirilir, uşaqlar üçün nəşrlər hazırlanır. Onların vətən tariximizi öyrənmələri və muzey eksponatlarını yaxından tanımalarına çalışılır.