Azərbaycanın görkəmli xeyriyyəçi ziyalısı H.Z.Tağıyev 1 sentyabr 1924-cü ildə vəfat edib. Özünün uzun və keşməkeşli həyatını Azərbaycan xalqına həsr edən bu böyük şəxsiyyət iqtisadi, maliyyə uğurları ilə yanaşı maarifçilikdə də bir sıra ilklərə imza atmışdır. İlk dünyəvi müsəlman qızlar məktəbi, Quranın ilk tərcümə və təfsirinin nəşr edilməsi, milli mətbuata himayədarlıq və s.-lər məhz H.Z.Tağıyevin adı ilə bağlıdır. Milli Azərbaycan Tarixi Muzeyində də onun irsi qorunur, tədqiq və təbliğ edilir. Muzeyin fondlarında Qacarlar sülaləsinin beşinci hökmdarı Müzəffərəddin şah Qacarın (1897-1907) H.Z.Tağıyevlə birlikdə əks olunduğu fotoşəkil (inv. № 498); xeyriyyəçiyə məxsus gümüş Quranqabı (inv. № 68); ekspozisiyada onun nəşr etdirdiyi “Kəşfül-həqayiq” təfsiri və s. materiallar mühafizə olunur. Muzey əməkdaşları H.Z.Tağıyev ilə bağlı dəyərli tədqiqat işləri yazır və mütəmadi nəşr edilir. O cümlədən, bu il Muzeyin direktoru, akademik Nailə Vəlixanlının elmi redaktorluğu və dosent Fərhad Cabbarovun müəllifliyi ilə “Hacı Zeynalabdin Tağıyev fotoşəkillərdə” albomu (Bakı, Elm və təhsil, 2020, 72 s.) çap olunmuşdur. MATM-nin daxilində fəaliyyət göstərən H.Z.Tağıyevin xatirə muzeyi də bu dahi şəxsiyyətin irsinin təbliği baxımından böyük rol oynayır. Muzeydə yaradılmış H.Z.Tağıyev klubu da bu görkəmli xeyriyyəçi şəxsiyyətin həyat və fəaliyyətinin öyrənilməsi və məktəblilərə təbliği sahəsində mütəmadi fəaliyyət göstərir. Allah rəhmət eləsin!