AMEA Milli Azərbaycan Tarixi Muzeyinin “Numizmatika və epiqrafika” şöbəsinin böyük elmi işçisi, t.ü.f.d. Aygün Məmmədovanın “Ağdam definesinde bulunmuş Trabzon asprı önemli numismatik tapıntıdır” adlı məruzəsi çap edilib (s. 305 - 313). Məruzə 21-22 avqust 2020-ci ildə Türkiyənin Trabzon şəhərində onlayn keçirilmiş VIII Beynəlxalq Mədəniyyət və Sivilizasiya Konqresinin “Məruzələr” toplusunda yer alıb. Məruzədə ötən əsrdə professor Yevgeni Paxomovun (1880 - 1965) qeydə aldığı, lakin yetərincə nəzəri tədqiqata cəlb edilməyən Ağdam şəhərində aşkarlanan 195 gümüş sikkədən ibarət dəfinə araşdırılıb. Dəfinədə olan Səlcuqlu sultanı IV Qılıc Arslan (646 – 647 = 1248 – 1249; 655 – 660 = 1257 – 1262; 660-664 = 1262 - 1266), Trabzon imperatoru II İoann Komnen (1280 – 1284; 1285 - 1297), Çingizi hökmdarı Munke (1251 - 1260), Elxani hökmdarları Abaqa (1234 - 1282) və Arğun (1284 - 1291) dövrünə aid gümüş sikkələrin səciyyəvi cəhətləri təqdim edilib. Həmçinin “xristian-hülakü” adlanan sikkə qrupu barədə də məlumat verilib. Nəticədə qeyd edilən dəfinənin XIII əsrin II yarısının pul təsərrüfatının açıqlanmasına yardım edən faktiki vasitə olduğu vurğulanıb.