Milli Azərbaycan Tarixi Muzeyində təşkil olunmuş faşizm üzərində qələbənin 75-ci ildönümünə həsr olunan “Azərbaycan II Dünya müharibəsi illərində” adlı sərgidə görkəmli həkim, cərrah Mustafa Topçubaşov tərəfindən kəşf olunmuş “yad cismləri xaricetmə qurğusu” nümayiş olunur. Azərbaycanda tibb təhsili və səhiyyənin təşkilatçısı, respublikada cərrahlıq elmi məktəbinin banilərindən biri, Azərbaycan SSR Elmlər Akademiyasının həqiqi, Bolqarıstan Elmlər Akademiyasının vitse-prezidenti Mustafa Topçubaşova (1895-1981) məxsus nadir eksponatlar Muzeyin Hədiyyələr və xatirə əşyaları fondunda qorunur. Bu, II Dünya müharibəsi illərində alimin ixtira etdiyi unikal tibb aləti olan “Yad cisimləri bədəndən xaric etmək üçün qurğu” və ona aid müvafiq kitabdır. Qurğu bədəndən mərmi qırıntılarını, güllələri, qəlpələri çıxarmaq üçün nəzərdə tutulmuşdur. Ağ metaldan hazırlanmış qurğunun hündürlüyü 35 sm, uzunluğu 72 sm-dir. Aparat 1958-ci ildə Milli Azərbaycan Tarixi Muzeyinə Mustafa Topçubaşovun özü tərəfindən hədiyyə edilmişdir. Onun Muzeyə təqdim etdiyi materiallar əsasında məlum olur ki, “sehrli iynə” adlanan bu aparatdan o dövrün bir çox cərrahiyyə klinikası istifadə etmiş, yüzlərlə yaralıya kömək olunmuşdur.