Milli Azərbaycan Tarixi Muzeyinin Elmi ekspozisiya və sərgilərin təşkili şöbəsinin kiçik elmi işçisi Nərmin Qasımovanın verdiyi məlumata əsasən, faşizm üzərində qələbənin 75-ci ildönümü ilə əlaqədar Muzeydə təşkil olunmuş “Azərbaycan İkinci Dünya mübaribəsi illərində” sərgisində Böyük Vətən müharibəsinin iştirakçısı, 4-cü qvardiya Kuban korpusunun tank əleyhinə qırıcı divizionunun komandiri, qvardiya mayoru Əliheydər İbrahimova aid eksponatlar nümayiş olunur. Əliheydər İbrahimova aid sənəd, xatirə silahı, orden və medallar, şəxsi əşyalar 1963-cü ildə ailəsi tərəfindən Muzeyə təhvil verilmişdir. Həmin əşyalar hazırda muzeyin 4 fondunda qorunur. 1920-ci illərdən süvari hissələrdə hərbi xidmətdə olan peşəkar hərbçi Əliheydər İbrahimov atçılıq idmanı ilə fəal məşğul olmuş, bir neçə at yarışmalarında qalib gəlmiş, Ümumittifaq miqyaslı bir qələbədən sonra marşal S.Budyonnı onu təltif edərək (xatirə hədiyyəsi sərgidə nümayiş olunur) Qırmızı Ordu üçün atçı kadrların hazırlanması işinə cəlb etmişdir. Rostov və Bakı ippodromlarının yaradılmasında xidmətləri olan Ə.İbrahimov ordudan istefaya çıxdıqdan sonra Bakı ippodromunun direktoru vəzifəsində çalışmışdır. 1941-ci ildə alman-faşist işğalçıları SSRİ-yə hücum etdiyi zaman Əliheydər İbrahimov müharibədə iştirak etmək üçün müraciət edir, yenidən süvari komandiri kimi xidmət etməyə başlayır. 1941-1943-cü illərin ağır döyüşlərində fəal iştirak etmiş Ə.İbrahimov 1944-cü ildə divizion komandiri vəzifəsində işğal olunmuş ərazilərin azad edilməsində iştirak edir. Bir sıra orden və medallar, o cümlədən nadir sərkərdəlik təltif nişanı olan "Aleksandr Nevski" ordeni ilə təltif edilən qəhrəman Brest şəhər və qalasının azad olunmasında böyük fəallıq, qəhrəmanlıq göstərmişdir. Bu döyüşlərdə ağır yaralanan, iki gözünü də itirən, 17 qəlpə yarası alan Ə.İbrahimov həyat yoldaşının köməyi ilə müalicə olunur, fəal həyata qayıdır. Onun və həyat yoldaşının mübarizəsi haqqında yazıçı P.Simonov “İki ürək” adlı povest yazmış, mərkəzi radio və qəzetlərdə oçerklər dərc olunmuşdur. Sərgidə Ə.İbrahimovun qılıncı, pilotkası, orden və medalları, Ali baş Komandanın təşəkkürnamələri, əmrlərdən çıxarışlar nümayiş olunur. 500-ə yaxın eksponat, 300-ə yaxın fotoşəkil nümayiş olunan “Azərbaycan II Dünya müharibəsi illərində” sərgisində Azərbaycan xalqının faşizm üzərində qələbənin qazanılmasına verdiyi töhfəni əyani olaraq görmək mümkündür. Xatırladaq ki, sərgi Milli Azərbaycan Tarixi Muzeyində həftənin I – IV günlərində saat 10.00-dan 17.00-dək açıqdır.