AMEA Milli Azərbaycan Tarixi Muzeyinin (MATM) fondlarında müxtəlif tarixi hadisələrin şahidləri olan 93 bayraq qorunmaqdadır. Onların sırasında Qarabağ xanı Mehdiqulu xana Rusiya imperatoru I Aleksandr tərəfindən təqdim olunan bayraq xüsusi əhəmiyyət kəsb edir (SBF. № 469). Tarixi əhəmiyyətinə görə bu bayraq demək olar ki, qiymətsizdir. Belə ki, bayraq Rusiya imperatorlarının məhz Cavanşir sülaləsindən olan Azərbaycan xanlarını əzəli Azərbaycan ərazisi olan Qarabağın hakimləri kimi tanımalarının maddi sübutudur: bayraq hakimiyyət rəmzi olaraq hədiyyə edilmişdir. Milli Azərbaycan Tarixi Muzeyi tərəfindən 2019-cu ildə “Qarabağ xanı Mehdiqulu xanın bayrağı” adlı kitab hazırlanıb çap olunmuşdur. Kitabda Muzeyin Silahlar və Bayraqlar fondunda saxlanılan, Qarabağ xanı Mehdiqulu xana Rusiya imperatoru I Aleksandr tərəfindən 1806-cı ildə təqdim olunan bayraq haqqında məlumat verilir. Mənbə və ədəbiyyat əsasında bayrağın təqdim edildiyi tarixi şərait, XX əsrdə Azərbaycana gətirilməsinin tarixçəsi və təsviri şərh edilir. Hakimiyyət rəmzi olaraq hədiyyə edilmiş bu bayraq Rusiya imperatorlarının məhz Cavanşir sülaləsindən olan Azərbaycan xanlarını əzəli Azərbaycan ərazisi olan Qarabağın hakimləri kimi tanımalarının maddi sübutudur. Kitabın müəllifi t.ü.f.d., dosent Səbuhi Əhmədov, elmi redaktoru akademik Nailə Vəlixanlıdır. Kitab Azərbaycan və rus dillərində çap olunub. Kürəkçay müqaviləsinə əsasən İbrahimxəlil xanın oğlu Məhəmmədhəsən ağaya boyunda daşımaq üçün qızıl, brilliantlarla bəzədilmiş, üzərində rus dilində "Qarabağ varisi Məhəmməd Həsən Ağaya sədaqətinə görə 1805-ci ildə ("Наследнику Карабага Мамед-Гасан-Аге за верност 1805 года) yazısı ilə qızıl medal təqdim edilmişdir. Medalın həmin dövrdə düzəldilmiş masaüstü xatirə nüsxəsi də hazırda Milli Azərbaycan Tarixi Muzeyində qorunur.