AMEA Milli Azərbaycan Tarixi Muzeyində Yeni Azərbaycan Partiyası Səbail rayon Təşkilatı “Azərbaycan tarixçiləri” ilk ərazi təşkilatının və AMEA Milli Azərbaycan Tarixi Muzeyinin Elmi-kütləvi iş və təhsil şöbəsinin birgə təşkilatçılığı ilə tədbir keçirilib. Azərbaycan Respublikasının dövlət müstəqilliyinin bərpasının 29-cu ildönümünə həsr olunmuş “Qarabağ bizimdir, Qarabağ Azərbaycandır!” adlı tədbir “Azərbaycan” himninin səsləndirilməsi ilə açılıb. Tədbirdə SƏS TV-nin hazırladığı Azərbaycan Respublikasının dövlət müstəqilliyi tarixi, həmçinin müasir dövrdə dövlətimizin uğurları barədə videoçarx nümayiş edilib. Sonra vətənimiz uğrunda şəhid olanların ruhu bir dəqiqəlik sükutla yad edilib. Tədbirin rəsmi hissəsində ilk çıxış edən Muzeyin “Azərbaycan tarixçiləri” ilk ərazi təşkilatının sədri Pərvanə Əzimova tədbir iştirakçılarını salamlayıb. “Ulu öndər Heydər Əliyev: “Müstəqil Azərbaycan naminə!” adlı məruzəsini təqdim edib. O, Ulu öndər Heydər Əliyevin Azərbaycanın müstəqilliyi uğrunda olan həlledici fəaliyyəti, həmçinin cənab Prezidentimiz, Ali Baş komandan İlham Əliyevin aktiv siyasəti dövründə qazanılan uğurlardan bəhs edib. Azərbaycanın üzləşdiyi müharibə şəraitində cənab Ali Baş komandanın torpaqlarımızın azadlığına yönəldilmiş siyasətinə və ordumuzun gücünə inandığını bildirib. “Azərbaycan sikkələri əsas dövlətçilik rəmzidir” adlı məruzə ilə Muzeyin Numizmatika və epiqrafika elmi fond şöbəsinin böyük elmi işçisi, t.ü.f.d. Aygün Məmmədova çıxış edib. Müasir dövrümüzdə dövlətimizin məqsədyönlü siyasəti nəticəsində üzləşdiyimiz ağır və məsuliyyətli sınaqlardan azad olunacagına inandığını bildirib və Azərbaycan sikkələrinin bütün tarixi dövrləri təmsil edən önəmli faktiki tapıntılar olduğunu vurğulayıb. Məruzəçi dövlətçiliyin başlıca rəmzi olan sikkə zərbi hüququnun məhz Azərbaycan sikkələri ilə təmsil edildiyindən və müstəqil Azərbaycanın numizmatik irsinin tədqiqi, təbliği sahəsində əldə edilmiş uğurlardan danışıb. Muzeyin Gənc Alimlər və Mütəxəssislər Şurasının sədri, t.ü.f.d. Sevinc Nəsirova “Qanla yazılan tarix” adlı məruzə edib. Müasir dövr hadisələrinə toxunaraq, xalqımızın müstəqilliyinin əldə edilməsində canlarından keçən vətən oğullarımızın rəşadətindən bəhs edib. O, suverenliyin bərpasında gənclərin daha fəal olduğunu vurğulayıb və gələcək qələbələrə inandığını qeyd edib. Sonda Muzeyin Numizmatika və epiqrafika elmi-fond şöbəsinin elmi işçisi Şəfa Mövsümov “Milli azadlıq hərəkatı və dövlət müstəqilliyimiz” adlı məruzə edib. Azərbaycan xalqının milli azadlıq hərəkatı tarixinə nəzər salaraq, 20 yanvar hadisələrindən və respublikamızda erməni separatizminə qarşı xalqımızın həmrəyliyindən bəhs edib. Məruzəçi SSRİ-nin dağılması və Azərbaycanın dövlət müstəqilliyinin bərpası uğrundakı mübarizə barədə ətraflı məlumat verib.