Azərbaycan Cümhuriyyətinin qurucusu M.Ə.Rəsulzadənin137-ci doğum günü münasibətilə onlayn görüş keçirilib. "M.Ə.Rəsulzadə Ev-Muzeyi" İctimai Qrupunun təşkilat komitəsinin təşkilatçılığı və dos. Firdovsiyyə Əhmədovanın aparıcılığı ilə Zoom proqramı üzərindən baş tutub. Tədbirdə təşkilat komitəsinin rəhbəri, prof. Solmaz Rüstəmova-Tohidi və s. yerli-xarici alimlər, həmçinin Muzeyin elmi katibi, dos. Fərhad Cabbarov, t.ü.f.d. Əli Fərhadov da iştirak və çıxış ediblər. Dos. F. Cabbarov "M.Ə.Rəsulzadə Ev-Muzeyi"nin yaradılması, irsinin qorunması, təbliği, mütəmadi olaraq beynəlxalq Rəsulzadə qiraətləri və s. tədbirlərin keçirilməsinin əhəmiyyəti mövzusunda, Ə.Fərhadov isə M.Ə.Rəsulzadə yaradıcılığında azərbaycançılıq, milli dövlətçilik, milli ədəbiyyat və Nizami Gəncəvi, din və siyasət, vicdan azadlığı mövzuları barədə çıxış ediblər. Qeyd edək ki, Milli Azərbaycan Tarixi Muzeyində də Rəsulzadə irsi qorunur və təbliğ edilir. Müxtəlif dövrlərdə Muzeydə M.Ə.Rəsulzadəyə həsr olunmuş sərgi və tədbirlər, o cümlədən onun 130 illiyinə həsr olunmuş elmi-praktik konfrans da keçirilmişdir. Həmçinin Muzeyin Silahlar və bayraqlar fondunda saxlanılan materiallar içərisində Cümhuriyyətin bayrağı saxlanılır. Bu nadir bayrağı 1952-ci ilin 28 may günü ərəfəsində Türkiyədə mühacirətdə olan M.Ə.Rəsulzadə öz həyat yoldaşı Leyla xanım ilə birlikdə hazırlamışdır. Keçmiş mühacir Gülmirzə Bağırov onu qoruyub saxlamış, Bakıya gətirmiş, 2003-cü ilin iyununda Milli Azərbaycan Tarixi Muzeyinə təqdim edilmişdir. M.Ə.Rəsulzadənin azərbaycanlı mühacir Süleyman Təkinərə mühacirət dövründə yazdığı məktublar da Muzeydə qorunur. 1950-1955-ci illər dövrünü əhatə edən məktublar Süleyman Təkinərin Bakıda yaşayan varisləri tərəfindən Muzeyə hədiyyə olunmuşdur. Bu mövzuda “Mühacirət irsimizdən: Məhəmmədəmin Rəsulzadənin otuz məktubu” adlı kitab (Bakı, 2018, 136 s.) nəşr olunub. Kitabı tərtib edən, ön sözün, qeyd və şərhlərin müəllifi Muzeyin elmi katibi, dos. Fərhad Cabbarovdur. Muzeyin Sənədli mənbələr fondunda M.Ə.Rəsulzadənin (1884-1955) əsərləri - “Şəkli-idarə haqqında iki baxış” (Bakı, 1917, Azərbaycan dilində), “Panturanizm haqqında” (Paris, 1930, rus dilində) və “Əsrimizin Səyavuşu” (Ankara, 1989, türk dilində) qorunur (inv. № 665/2/3/4). Adı çəkilən məktub və əsərlər Cümhuriyyət tariximizin və Rəsulzadə irsinin tədqiqi və təbliği baxımından əhəmiyyətlidir.