Gənc yazıçı-publisist Əfsanə Bayramqızının “Türksoylu xalqların elektron media kataloqu” kitabı “Elm və təhsil” nəşriyyatında çapdan çıxmışdır. AzərTAc xəbər verir ki, kitabda türksoylu xalqlara aid müxtəlif məzmunlu, əhəmiyyətli saytlar barədə məlumatlar yer almışdır. Kitab Azərbaycan başda olmaqla, 7 müstəqil türk dövləti, muxtar respublika və vilayətləri, eləcə də azsaylı türk

toplumlarının internetdə fəaliyyət göstərən əsas media resurslarını əhatə edir. Buraya dövlət strukturları, əsas aparıcı qəzet və jurnallar, informasiya agentliklərinin saytları, xəbər portalları, eləcə də mədəni irsi, ədəbiyyatı, musiqi və digər sahələri əhatə edən elektron resurslar daxildir. Nəşr, müştərək tarixi keçmişə, dil, mədəni irs və adət-ənənələrə malik türksoylu xalqları əhatə edən virtual elektron resurslarının bir araya toplanmasında, bununla da türk coğrafiyasında olan jurnalistlərin, yazıçıların, elm adamlarının arasında əlaqələrin daha da möhkəmlənməsi baxımından qiymətli vəsaitdir.