II Qarabağ müharibəsi zamanı Ağdərə və Tərtər rayonlarının azad edilməsi uğrunda döyüşlərdə iştirak edərək xəsarət alan Rövşən Mehdi oğlu Mehdiyev Milli Azərbaycan Tarixi Muzeyini ziyarət edib.

R.Mehdiyev 31 avqust 1999-cu ildə Qusar rayonunun Xurel kəndində anadan olub. 2006 - 2016-ci illərdə həmin kəndin tam orta məktəbində təhsil alıb. 2016 - 2020-ci illərdə Bakı Biznes Universitetinin “İqtisadiyyat” fakültəsində bakalavr pilləsi üzrə təhsil alıb. Ali təhsilini bitirdikdən sonra o, hərbi xidmətə getmək qərarı verib.

Döyüş yoluna Goranboy rayonunun N saylı hərbi hissəsində xidmətə başlayıb və “snayperçi” üzrə təlimlərdə iştirak edib.

44 günlük müharibə zamanı R.Mehdiyev Tərtər rayonunun Talış kəndində Ağ uçuq adlı məntəqədə “Vışka” adlı mövqeni qoruyarkən mina atəşi zamanı zədələnmişdir.

Muzeyi ziyarət etdikdən sonra qazi R.Mehdiyev hərbi döyüş yolu, təəssüratları haqqında məlumat verib, Muzeydə keçiriləcək "Anadır arzulara hər zaman Qarabağ!" sərgisi ilə əlaqədar müvafiq əşyalarını təhvil verib.