24 may 2021-ci il tarixində Tver Dövlət Mərkəzləşmiş Muzeyi, Rusiyanın Dövlət Tarix Muzeyi, Dövlət Ermitajı və Rusiya Elmlər Akademiyasının Arxeologiya Muzeyinin təşkilatçılığı ilə Rusiyanın Tver şəhərində XXI Ümumrusiya Numizmatika Konfransı keçirilmişdir. 

AMEA Milli Azərbaycan Tarixi Muzeyinin “Numizmatika və epiqrafika” elmi-fond şöbəsinin böyük elmi işçisi, t.ü.f.d. Aygün Məmmədova “Afanasi Nikitininin yolları ilə: Ağsu çayı sahillərindəki Kaşin sikkəsi” adlı məruzə ilə konfransda onlayn formatda çıxış etmişdir (Həmmüəllif: Moskva şəhərindəki Dövlət Tarix Muzeyinin numizmat alimi, t.ü.f.d. Zaytsev Vasili). Məruzə məqalə şəklində konfrans materiallarında nəşr edilmişdir (Путями Афанасия Никитина: кашинское пуло с берегов реки Агсу // Двадцать первая Всероссийская Нумизматическая Конференция. Тверь, 2021, с. 168 – 171).

Məqalədə ilk dəfə olaraq nadir numizmatik fakt - 2010-cu ildə arxeoloq-alim, t.ü.e.d., professor Qafar Cəbiyevin rəhbərliyi ilə Ağsu rayonunun “Xaraba şəhər” adlı qədim yaşayış yerində aşkarlanan, hazırda muzeyin Numizmatika Fondunda qorunan XV əsrin Kaşin mis sikkəsi (1,77 q, NF 56062) barədə məlumat verilmişdir.