2020-ci il iyul ayının 12-də Ermənistan Silahlı Qüvvələrinin Ermənistan-Azərbaycan dövlət sərhədinin Tovuz rayonu istiqamətində atəşkəs rejimini kobud şəkildə pozaraq mövqelərimizi ələ keçirmək məqsədilə hücuma keçməyə cəhd etməsindən bir il ötür.
Azərbaycan Ordusunun 12 hərbi qulluqçusu - general-mayor Polad Həşimov, polkovnik İlqar Mirzəyev, mayor Namiq Əhmədov, mayor Anar Novruzov, baş leytenant Rəşad Mahmudov, gizir İlqar Zeynallı, gizir Yaşar Babayev, müddətdən artıq hərbi xidmət qulluqçuları - əsgər Elçin Mustafazadə, çavuş Vüqar Sadıqov, əsgər Nazim İsmayılov, baş əsgər Elşad Məmmədov və əsgər Xəyyam Daşdəmirov həmin döyüşlərdə qəhrəmancasına şəhid olub.
Onlardan General-mayor Polad Həşimova aid 3 ədəd fotoşəkil, istiləşdirilmiş qış gödəkçəsi, üzərində general - mayor hərbi rütbəsi olan kitel, şalvar, baş geyimi və Polkovnik İlqar Mirzəyevə məxsus kitel, şalvar, papaq, kəmər, qobur, qısaqol köynək, çəkmə və içərisində hərbi ləvazimatlar olan hərbi səhra çantası hazırda AMEA Milli Azərbaycan Tarixi Muzeyinin Vətən Müharibəsi Fondunda qorunur.
