Vətən müharibəsi iştirakçısı, qazi Nihat Əfəndi AMEA Milli Azərbaycan Tarix Muzeyini ziyarət etmişdir. Nihat Əfəndi “Anadır arzulara hər zaman Qarabağ!” və “Azərbaycan Atabəyləri dövləti” sərgiləri ilə tanış olaraq, şəxsi əşyalarını (fotoları, tərcümeyi–halı, onu yaralamış güllə başlığını) Muzeyin Vətən Müharibəsi Fonduna təhvil vermişdir.  

Məlumat verək ki, Nihat Aydın oğlu Əfəndi 19 iyul 1999-cu ildə Sumqayıt şəhərində dünyaya gəlmişdir. O, 2005-2014-cü illərdə Sumqayıt şəhərindəki 29 saylı orta məktəbdə təhsil almışdır. IX sinifi bitirdikdən sonra 2016-cı ildə Bakı şəhərindəki 2 saylı peşə liseyini “video operator” ixtisası üzrə bitirmişdir.

2017-ci ilin iyul ayında həqiqi hərbi xidmətə çağırılmış və Ağdam rayonundakı “N” saylı hərbi hissədə xidmət edərək 2019-cu ilin yanvar ayında  ordu sıralarından tərxis olunmuşdur.

Məktəbli yaşlarından səkkiz il Sumqayıt şəhərindəki “Aliminium” idman zalında “sərbəst güləş” üzrə məşğul olmuşdur.

2020-ci ildə Vətən müharibəsinin başlaması ilə əlaqədar olaraq səfərbərliyə cəlb edilmiş və cəbhəyə göndərilmişdir. 

21 sentyabrda əvvəlcə Qusar rayonundakı “N” saylı hərbi hissəyə, 27 sentyabrdan isə Qarabağ ərazisinə göndərilmişdir. Füzuli, Cəbrayıl və Xocavənd ərazisindəki döyüşlərdə iştirak etmişdir.

2020-ci il oktyabrın 13-də Hadrutun azad edilməsi əməliyyatında düşmənin artilleriya atəşi nəticəsində sol gözündən və sağ ayağından yaralanmışdır.

2020-ci il noyabrın 3-dən yenidən hərbi əməliyyatlara cəlb edilmişdir. Həmin ilin 30 dekabrında ordu sıralarından tərxis olunmuşdur. 

“Vətən müharibəsində fəal iştirak etdiyinə görə” Fəxri Fərmanı ilə təltif edilmiş və “Füzulinin azad olunmasına görə” medalına layiq görülmüşdür.

Qeyd edək ki, Muzeyin əməkdaşı Aygün Məmmədova qazinin şəxsi əşyalarının Muzeyə təhvil verilməsində vasitəçi olmuşdur.