Azərbaycan Respublikasının Prezidenti İlham Əliyevin Azərbaycan Respublikasında 2022-ci ilin “Şuşa İli” elan edilməsi haqqında Sərəncamına əsasən AMEA Milli Azərbaycan Tarixi Muzeyində "Xarıbülbül - Şuşanın simvolu” adlı ustad dərsləri keçirilib. Ustad dərslərində Bakı-İstanbul liseyinin Azərbaycan dili, rus dili, ingilis dili bölmələrinin şagirdləri iştirak edib. Dərs nəzəri hissədən və praktik dərsdən ibarət olub. Dərsin birinci hissəsində Muzeyin İnnovasiyalar və təhsil proqramları şöbəsinin əməkdaşı Nigar Əhmədli dərs iştirakçılarını salamlayıb, Xarıbülbül haqqında məlumat verib.

Dərsin ikinci hissəsində isə çiçək şəkilli pazl yığılıb, gipsdən hazırlanmış fiqur üzərində rəngli boya ilə Xarıbülbül çiçəyinin çəkilmə və rənglənmə qaydası öyrədilib.

Daha sonra H.Z.Tağıyevin ev muzeyinə, "Nizami Gəncəvi və Azərbaycan Atabəyləri dövləti" sərgisinə ekskursiya təşkil olunub.

İştirakçılar hazırladıqları nümunələri özləri ilə aparıblar.