Bəşəriyyət üçün dəhşətli, faciəli fəlakətlər dövrü kimi yadda qalan İkinci Dünya müharibəsində Azərbaycan faşizm üzərində tarixi Qələbəyə sanballı töhfələr verib. Bu şanlı Qələbədə böyük payı olan Azərbaycan xalqı cəbhəyə 600 mindən çox oğul və qızını yola salıb. Onların təxminən yarısı döyüş meydanlarından geri qayıtmayıb. Həmin müharibə zamanı göstərdikləri igidliyə görə 130-dan çox Azərbaycan vətəndaşı Sovet İttifaqı Qəhrəmanı adına layiq görülüb, 170 mindən çox əsgər və zabitimiz isə müxtəlif orden və medallarla təltif edilib. İkinci Dünya müharibəsində Qələbənin qazanılmasında Bakı neftinin də əvəzsiz rolu olub.
Qeyd edək ki, Milli Azərbaycan Tarixi Muzeyində İkinci Dünya müharibəsinə aid materiallar qorunur və bu materiallar əsasında bir sıra sərgilər nümayiş olunmuşdur.