Ümummilli lider Heydər Əliyevin 4 iyun 2001-ci il tarixli Sərəncamı ilə Azərbaycan Respublikasının sosial inkişafı sahəsində tibb işçilərinin böyük xidmətləri və Azərbaycan Xalq Cümhuriyyətinin ilk Səhiyyə Nazirliyinin 1918-ci il iyunun 17-də yaradılması nəzərə alınaraq  iyunun 17-i Azərbaycan Respublikası tibb işçilərinin peşə bayramı günü kimi qeyd olunur.

Milli Azərbaycan Tarixi Muzeyinin kolleksiyası Azərbaycan elminin ayrı-ayrı sahələrinə, o cümlədən tibb elmlərinə aid müxtəlif səpkili materiallarla zəngindir.

Muzeyin Sənədli Mənbələr fondunda qorunan, ölkəmizdə tibb elminin çox mühüm bölümü olan oftalmologiyanın inkişafına dair təqdim olunan materiallar nadir nümunələrdəndir.

Təqdim olunmuş fotoşəkildə Azərbaycanın görkəmli oftalmoloqu, Azərbaycan SSR əməkdar elm xadimi, tibb elmləri doktoru (1976), professor (1979), Azərbaycan Milli Elmlər Akademiyasının həqiqi üzvü (1983) Zərifə Əliyeva əməliyyat otağında təsvir olunmuşdur.

Qeyd etmək lazımdr ki, Z.Əliyeva səhiyyədə kadr hazırlığına və həkimlərin ixtisasının təkmilləşdirilməsinə gərgin əmək sərf etmişdir. Onun birbaşa rəhbərliyi altında cavan alimlərin və həkim-oftalmoloqların böyük bir nəsli yetişmişdir.

Digər təqdim olunan fotoşəkil 1940-cı ildə çəkilmişdir. Fotoda Bakı Göz Xəstəlikləri Xəstəxanasının əməkdaşlarını görürük. Öndə müəssisənin direktoru M.Abbasov, onun solunda və sağında Azərbaycanda göz müalicəsinin təşəkkülündə misilsiz  xidmətləri olan üç qadın alim – Umnisə Musabəyova, Sona Vəlixan və Sona Axundova əyləşiblər.

Tibbə dair təqdim olunan digər materiallar isə muzeyin Etnoqrafiya fondundandır. Fondda XIX əsrə aid həkim çantası, həcəmət (qan almaq üçün istifadə edilən alət), cərrahiyədə istifadə edilən tibbi bıçaq, əczaçılıq alətləri qorunub saxlanılır.

Ölkəmizin tibb tarixinin tədqiq olunması baxımından bu materiallar böyük əhəmiyyətə malikdir.