XƏBƏRLƏR
XƏBƏRLƏR -
Mühüm hadisələr
26 İyun, 2022
Muzey əməkdaşı Şəki rayonunda keçirilən tədbirdə iştirak edib

26 iyun - Azərbaycan Respublikası Silahlı Qüvvələr Günü Bakı şəhəri Xətai rayonu Tahir Bağırov adına 59 saylı tam orta məktəbin təşəbbüsü və Xətai rayon Həmkarlar Təşkilatının dəstəyi ilə Vətən müharibəsi şəhidi Umudlu Elmir Pərviz oğlunun xatirəsi doğulduğu Şəki rayonu İnçə -Zunud kəndində yad edilib.

Tədbirdə Şəki rayonu İcra Hakimiyyətinin nümayəndələri, Bakı şəhəri Xətai rayonu T. Bağırov adına 59 saylı tam orta məktənin direktoru Pikə Əhmədova, məktəbin müəllim kollektivi, şəhidin valideynləri, döyüş yoldaşları və qazilər iştirak ediblər.

Tədbirdə Milli Azərbaycan Tarixi Muzeyinin İnnovasiyalar və Təhsil Proqramları şöbəsinin elmi işçisi Sahibə Ələkbərova “Tarix yazan qəhrəmanlar” layihəsinin ideya müəllifi və rəhbəri olaraq iştirak edib. Tədbir iştirakçıları öncə şəhidin adını daşıyan küçədəki xatirə lövhəsini, şəhid bulağını və onun doğulduğu baba ocağını ziyarət ediblər. Sonra Şəki rayonu İnçə-Zunud kənd tam orta məktəbində Elmir Umudlunun adını daşıyan sinif otağında oturduğu parta ilə tanış olublar, onun haqqında müəllimlərin danışdığı xatirələri dinləyiblər.

Qeyd edək ki, Umudlu Elmir Pərviz oğlu 28 oktyabr 2020-ci ildə Xocavənd rayonunda gedən şiddətli döyüşlərin birində şəhidlik zirvəsinə ucalıb. Elmir Umudlu oktyabr ayının 31-də ata-baba yurdu olan Şəki rayonunun İnçə-Zunud kənd qəbiristanlığında dəfn olunub.

Prezident İlham Əliyevin Sərəncamları ilə döyüşlərdə göstərdiyi şücaətlərə görə "Vətən uğrunda", "Füzulinin azad olunmasına görə", "Cəbrayılın azad olunmasına görə", "Xocavəndin azad olunmasına görə" medalları ilə təltif olunub.

Qeyd edək ki, tədbir iştirakçıları Elmir Umudlunun dəfn edildiyi İnçə-Zunud kənd qəbirsanlığını və Şəki rayon Şəhidlər xiyabanını da ziyarət etmişlər.

S.Ələkbərova da öz növbəsində tədbirə qatılan iştirakçılara Milli Azərbaycan Tarixi Muzeyində şəhidlərin xatirəsini əbədiləşdirmək məqsədi ilə yaradılan Vətən Müharibəsi fondu və onun əhəmiyyəti haqqında, eyni zamanda gənclərin vətənpərvərlik ruhunda tərbiyə edilməsi məqsədilə muzeydə həyata keçirilən layihələr və tədbirlər haqqında məlumat verib .