Milli Azərbaycan Tarixi Muzeyinin Azərbaycan Tarixinin Elmi Tədqiqi və Təqdimi şöbəsinin aparıcı elmi işçisi, t.ü.f.d., dosent Bəhman Kərimov 2022-ci il oktyabrın 18-də Azərbaycan İstiqlal Muzeyində “18 Oktyabr – Müstəqilliyin Bərpası Günü” ilə əlaqədar tarix elmlər doktoru Tufan Axundovun tərtibçisi olduğu “Təlatümlü illər” adlı xatiratın təqdimatında iştirak etmişdir. Soltan Məhəmməd bəy Qulubəyli tərəfindən qələmə alınmış kitab 1917-1920-ci illərdə Azərbaycanın cənub-şərq regionunda ərazi bütövlüyü uğrunda mübarizə tarixinə həsr olunmuşdur.

Tədbirdə Bəhman Kərimov Soltan Məhəmməd bəy Qulubəylinin əsərinin Vətən tarixşünaslığında xüsusi əhəmiyyətə malik olduğunu qeyd edərək, 1917- 1920-ci illərdə Şimali Azərbaycanın cənub-şərq regionunda erməni-bolşevik dəstələrinin törətdiyi qırğınlar və bölgədə Azərbaycanın ərazi bütövlüyü uğrunda mübarizə tarixi haqqında məruzə ilə çıxış etmişdir.