Milli Azərbaycan Tarixi Muzeyi Dünya Azərbaycanlılarının Həmrəyliyi Günü və Yeni il bayramı münasibətilə "Ümid yeri" uşaq sığınacağında xeyriyyə tədbiri keçirib.

Qeyd edək ki, Milli Azərbaycan Tarixi Muzeyinin əməkdaşları öz elmi-kütləvi fəalliyyəti ilə yanaşı, məşhur xeyriyyəçi H.Z.Tağıyev irsinin davamçısı və təmsilçisi kimi xeyriyyə işlərinə də diqqət ayırır. Muzey əməkdaşlarının ianəsi ilə toplanan vəsaitlə sözügedən sığınacaqda kimsəsiz uşaqlara qida, isti geyim və müxtəlif həvəsləndirici hədiyyələr təqdim olunub.

Tədbirdə muzeyin İnnovasiyalar və təhsil proqramları şöbəsinin müdiri Fəridə Şəmsi tədbirin əhəmiyyəti haqqında çıxış edərək, həm muzeydə, həm də muzeydənkənar fəaliyyətlərində muzeyin uşaqlara diqqət və qayğı göstərməsini xüsusi vurğulayıb.

Daha sonra çıxış edən "Ümid yeri" xeyriyyə cəmiyyətinin sədri Nigar Mənsimli rəhbərlik etdiyi müəssisənin müəllim və uşaq kollektivi adından muzeyin baş direktoru, akademik Nailə Vəlixanlıya və muzey əməkdaşlarına öz minnətdarlığını  bildirib.

Tədbirin sonunda Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin təşkilatçılığı ilə əyləncəli proqram təşkil olunub və uşaqlara hədiyyələr təqdim edilib.