Milli Azərbaycan Tarixi Muzeyində mühafizə olunan zəngin kolleksiyanın ictimaiyyətə təqdim olunması məqsədilə yeni ekspozisiyanın qurulması prosesi həyata keçirilir.

Qeyd edək ki, eksponatlar əsasən bölmələr üzrə qruplaşdırılır. Əşyaların tarixi-mədəni əhəmiyyəti nəzərə alınaraq, yeni qurulacaq ekspozisiya üçün müəyyən mövzular üzrə panel mətnləri hazırlanır, yeni eksponatlar seçilir və paralel olaraq, texniki hazırlıq işləri aparılır. Ekspozisiyanın daş və tunc dövrlərini əhatə edən tapıntıların nümayiş olunduğu zallar üçün eksponatlar müvafiq vitrinlərə yerləşdirilir. Antik və orta əsrlər dövrləri təqdim ediləcək digər zallarda isə materialların seçilməsi və yeni tapıntıların cəlb edilməsi istiqamətində işlər davam etdirilir.

Ekspozisiyanın qurulması prosesi zamanı mütəmadi olaraq muzeyin rəhbərliyi və bir sıra əməkdaşları tərəfindən işıq və rəng amili, müasir texniki avadanlıqlardan istifadə qaydaları və xüsusi olaraq eksponatların estetik təqdimatının vacib məqamları müzakirə edilir.